صباح الحرية من جامعة الثورة

سنفور كهربجي

رغم أنو اليوم المظاهرات داخل الكليات كانت أكتر من مبارحة و انضمتلا كلية الطب و الزراعة بس مارح اذكر شو صار و رح ركز عالمظاهرة الخارقة الحارقة المت...فجرة

المظاهرة الحلم :

كل محاولة للتظاهر بساحة الجامعة مابتستمر اكتر من دقيقتين تلاتة بس اليوم كان غيــــر

عالساعة تلاتي تلاتي وربع طلعنا من فحص العملي " كلية الكهربا "و خبر وصول المراقبين للجامعة يتم تناقله بين الطلاب , فورا و بدون تردد أو تفكير رحنا عالباب المؤدي الى ساحة الجامعة " طبعا الباب مسكر من الفصل الأول لمنع وصول الطلاب للساحة " بس الطلاب نطو من فوق السور بالعشرات و كلون ررررركد عالباب الرئيسي للجامعة " فيما بعد تم تسكيره علما أنه الباب الوحيد الممكن للدخول للجامعة " و هون كان في عناصر من حفظ النظام و الشرطة والمخابرات و عم يمنعو الطلاب من الدخول بس لأول مرة ما حدا برد عليهون و بتجاهلن و بدخلو و فوراااااا لقدام مبنى الحزب , لما شفنا المظاهرة شاعلة ركضنا بسرررررعة لمكان المظاهرة و كانو ضاربين قنابل غاز قدام المراقبين , المراقبين كانو بمبنى الحزب و العالم عم

تهتف و تلعن روحو لحافظ و البطة و تلعن الحزب وشو مابدكن صار "تخيلو تكونو قدام مبنى الحزب عم تتظاهرو شو بتعملو ؟ "

سيارات المراقبين صارت جدران للحرية ماضل فيها سنتيمتر واحد ما أنكتب علي, طلعو المراقبين و حكو مع الطلاب و عطون اسماء معتقلين من الجامعة و اسماء الشهداء

في كم شبيح من شبيحة الحزب جنو من هل منظر و بلشو يضربو حجر و بلور و انجرح طالب و صورو المراقب

استمرت المظاهرة و قلنا للمراقبين انو بس يروحو بدون يضربو رصاص و يعتقلونا, جاوبنا المراقب المغربي انو مار يسمحلن و رح يروحو معنا لبين ما نوصل عمحل آمن

و هون شوي شوي بلشنا ننزل عساحة الجامعة و وصلنا عساحة الطب و هون لما شوفنا صورة الكر الفاطس السيراميكية "يلي رجمناها بمظاهرة سابقة" ما تحملنا حالنا و بلشنا نضربو و نكسرو و نبخ علي لبين ما تشوووووهت تماما, ورفعنا علم استقلال على سارية موجودة بساحة الطب.

اضطر مرتزقة الحزب غصبن عنهم يفتحو كل أبواب الساحة و باب كلية الكهربا, بعدين زحفنا بالآلاف عساحة الجامعة "ساحة الجامعة تاني أكبر ساحة بحلب بعد ساحة سعدالله تشابه ساحة السبع بحرات بالشام"  و كتير طلاب رفقاتي تركو امتحاناتن العملي و نزلو عالمظاهرة و قلنا لبعض منضحي بروحنا مو بس بفحصنا مشان نحضر المظاهرة

كان شعورنا بوصولنا عالساحة وكأننا أسقطنا النظام و كسرنا راسو و تظاهرنا غصب عنو بالساحة , الطريق انقطع من المحاور الاربعة بسبب اعدادنا الكبيرة, و تمت إزالة بعض الصور الباقية لمجلس المشرشحين , علقت أعلام الإستقلال على أكتر من سارية و علق علم كبير على مدخل الجامعة و هون جنينا رسمي و ما صدقنا حالنا و صرنا نضم بعض مو مصدقين اللي عم نشوفو.

الهتافات و الأغاني هزت المنطقة بالكامل و وصلت لفرع أمن الدولة و بيت المحافظ و بيت المفتي حسون الملعون "اذا بوقف حسون عالبلكون بشوفنا"

الهتاف لحمص كان مزلزل طبعا, ماضل ضيعة و مدنية ما هتفنالها, هتفنا للوحدة الوطينة هتفنا لأخوتنا المسيحية و الدرزية و العلوية هتفنا آذادي آذادي, غنينا سكابا , جايينك جايينك يلعن روحك جايينك , يا إيراني كلبك ودع ..... و أغاني تانية ...

في حجّة حكت مع المراقبين عرفنا بعدها انو ابنها شهيد و هتفنالها أم الشهيد نحن ولادك و الكل عم يبكي و بسنا راسها و هي باست راسنا و هتفت و تظاهرت معنا ...

استمرت المظاهرة أكتر من ساعتين و نص و كتبا عالطريق بالتراب الابيض شعارات الثورة ..

و خلال تلك الساعتين و نص, ما استطاع النظام يجمع 50 شخص يهتفولو وهو الذي يتبناها بمليونياته المتكررة !!!!!

و ما كان في إلا هل كم مرتزق صارو يحاجرونا و جرحو كم شخص و اسعفو والحمد لله

هتفو المتظاهرين على بعد أمتار منون و جنو بزيادة وضربو حجر مباشر علينا و اضطرينا نرد عليهون و تدخل الأمن بأعداد كبيرة وضرب غاز و بلشت العالم تتفرق ...

رجعنا تجمعنا بس باقل من دقيقة هجمو مرة تانية وهون بلشت تفرط المظاهرة

نحن و عم نركض سمعنا صوت الرصاص, في شب انجرح بس ما بعرف اذا من الرصاص أو الهراوات و اسعفو الهلال

و في طريق العودة, عرفنا إنّو الشبيحة و الأمن منتشرين بمنطقة المريديان بأعداد ضخمة, لذلك رجعنا من طريق المحافظة و الموغامبو و نحن عم نرجع عم نقول بالشوارع يلعن روحك يا حافظ, جايينك جايينك يلعن روحك جايينك, وصلت عالبيت و أنا لهلأ مو مصدق الشي اللي صار

حسينا اليوم انو هتاف "ساحة سعد الله جايينك والله" رح يصير حقيقة بوقت كتير قريــــــــب, و عم نتخيل كيف رح يكون شعور الشبيحة لما يشوفو الساحة كيف صارة ساحة حرية

في لوحة إعلانات كبيـــــرة مكتوب عليها "الحرية تبدأ باحترام القانون" شقيناها بالنص و صارت بس " الحرية " و علقو جنبها علم استقلال و المنظر كان راااااائع

اليوم تمنينا الجامعة ما توقف بالصيف مشان نتظاهر كل يوم متل ماصار هل اسبوع !

أخيرا وليس آخرا منوعدكم انو مارح نكل ولا رح نمل طالما الدم عم يجري بعروقنا و بدنا نتظاهر و نتظاهر لبين ما يسقط النظام, هي ثورة يا جماعة و الثورة تعني ثورة للآخر, ما في ملل أو كلل, ما في تخاذل و ما في تراجع.

و إنشالله الملخص التالي اللي بكتبو بكون عن مظاهرة ساحة سعدالله و الله يطعمني عيش لشوف هداك اليوم اللي مننزل في عالساحة

كل التحية والسلام من أخوكم السنفور

ســــاحة سعد الله جـــــايينك واللـــــــه