أهزوجة الشَبّيحة

طريف يوسف آغا

أهزوجة الشَبّيحة

طريف يوسف آغا

[email protected]

طلّوا طلّوا الشَبّيحة

ونَبَحوا نَبَحوا النَبّيحة

نُصُنْ ناسْ فاجرة

ونُصُنْ كلابْ داشرة

والكلابْ مابتِنلامْ

مَهْما نَبحتْ للنِظامْ

وهي الدابّي اسْتقالْ

وبالنائِصْ مِنْ دجّالْ

دودِ الخلْ منو وفيهْ

يخربْ بيتو شو مِحتالْ

وينَكْ يادابي وينَكْ

العمى العمى بِعينَكْ

عينَكْ مالا شايفة

الدباباتْ صافّة

وادنَكْ مالا سامعة

المدافِعْ قاصفة

إلّي إلّي بشو رَشوكْ

حتى تَزَوِرْ هَالتَقريرْ

إلّي إلّي شو عطوكْ

حتى تزمِّرْ هالتَزميرْ

انشالله تكونْ عارِفْ

حَبلِ الكِذِبْ آصيرْ

وإصحى تكونْ ناسي

الكَذّاب عَجْهَنَّمْ

هالنِظامْ ماشي

مصابحْ مماسي

وأنت بدَرعا بِدُنْ ياكْ

وهي حِمْصْ بتِستَنّاكْ

وبدارفورْ عاوزينَكْ

وبلاهاي طالبينَكْ

***

طلّوا طلّوا الشَبّيحة

ونَبَحوا نَبَحوا النَبّيحة

يا معَلِمْ هَدي حالَكْ

هيْ أوربة مو إشْطة

ويابُثَينة ياشَعبانْ

حَضْري حالِكْ عَالشِّرطة

الجَعفَري بدو خرجية

للدوَلِ الخليجية

والحَسونْ بيزَأزِئ

شوية زيتْ زَيِتلو

والبوطي عَمْ يِفْتي

خَرزة زَرْأة حِطِّلو

وهيْ طالِبِ ابراهيم

عَمّا يَطوَلْ ويِئْصَرْ

وهَيو آبو عَبدَ الله

عَمّا يِزئَعْ ويبئَعْ

وهَيو أحمدْ حَجْ عَلي

عَمّا يِردَحْ ويِنْطَحْ

وهادا شَريفِ شْحادة

برافو فيصَلْ سَوَّحو

وعبدِ المسيحْ الشامي

شَئْفِةْ كِرسي رَوَّحو

هالكِرسي المِتآمِر

كيفْ كيفْ طَوَّحو

ويادريدْ يالحّامْ

عمّا تأيِدْ اللحّامْ

جبينكُنْ والله واطي

وجبينِ الشَعبْ عالي

***

طلّوا طلّوا الشَبّيحة

ونَبَحوا نَبَحوا النَبّيحة

وهالنِظامْ فارِطْ

وائِفْ وائِفْ على نَكْشة

وكِلْ يومْ عَمْ يِغرَأ

بِدو مِنْ حَدا أشَّة

والأشّة عَندِ الروسْ

والروسْ بِدونْ فلوسْ

والفلوسْ عَندِ الصينْ

والصينْ بِدها بترولْ

والبترولْ بإيرانْ

وهَيِّ عِينا عَلينا

يامَسكينة سورية

مينْ ماجاكي مَنهوبة

حاكِمْها آتِلْها

وحاميها حَراميها

ومِنْ هالِكْ لَمالِكْ

لأباضِ الأرواحْ

الله يَخَلِصْنا مِنهُنْ

غيرِ الدمْ مامِنهُنْ

مِنِ الحِكامْ وزِلمُنْ

مِنْ جُوّا ومِنْ بَرّا

ويَلْلا أرَّبْ يومْكُنْ

وانشاْالله مِنْشوفكُنْ

بِالآفَصْ مِنْشوفكُنْ

وبِالسِجِنْ مِنْشوفكُنْ

وهالشَبّيحة للأَبَدْ

بالسِجِنْ للأَبَدْ

راحوا راحوا الشَبّيحة

وخرسوا خرسوا النَبّيحة

راحوا راحوا الشَبّيحة

وخرسوا خرسوا النَبّيحة