يوميات ستي الله يرحمها

معاذ عبد الرحمن الدرويش

يوميات ستي (1)

كانت ستي عم تحلب العنزة الشامية الحمراء ...داست العنزة على جوال ستي فكسرته
إجي جدي من الفلاحة المساء ...خافت ستي تقول له إنه العنزة كسرت الجوال ..بعدين لمن سألها جدي ليش آخر ظهور إلك على الوتساب من الساعة 7 الصبح مانك بالعادة ..قالت له إنه الجوال كسرته العنزة، قام جدي عصب و صيح و إحتار إنه يضرب العنزة و لا يضرب ستي،
بعدين إستهدى بالرحمن حط راسه و نام ، و من الصبح راح على دكان حاج صالح ، إشترى لستي (آيفون10) بعد ما كان عندها (سامسونج اي 3)

+++++++++++++++++++++++

يوميات ستي(2)

قعدت ستي مثل كل يوم صلت الصبح ..حطت "الزوادة" لجدي رغيفين خبز و كمشة زبيب
ركب جدي البغلات و راح على الفلاحة
ستي فاتت على المغارة ..قشت "زبل الدواب" الله يعزكم
ساوت من الزبل "جلة"، بعد ما خلصت أخذت صورة سيلفي و الجلة كانت خلفها
حطت الصورة على حالتها على الفيس بوك و الوتساب ..و خوذ لايكات و تعليقات من نسوان الضيعة 

++++++++++++++++++++++

يوميات ستي(3)

كانت ستي عم تكنس الشارع قدام الدار.. مر حاج سليم صبحها بالخير ردت عليه الصباح
مرت أم محمود زعلانة سلمت على ستي بنشافة
قالت لها ستي: خير أم محمود شايفي وجهك ما عاجبني اليوم؟
قالت أم محمود: مبارح نزلت صورة البقرة إلي إشتريناها جديد
اشتهيتك تحطي لايك أو تكتبي لي مبروكة
قالت ستي يشهد علي ربي ما شفت منشورك .. مبارح كنت بالحصاد و نسيت ما إشحن الجوال بالليل فظل مطفي كل اليوم
بس خلصت شغل البيت جاي بارك لك بذاتي
قالت أم محمود أهلا و سهلا
بس ما برضى بدون لايك وكم تعليق كمان على صورة البقرة

++++++++++++++++++++++

يوميات ستي ( 4 )
اليوم عند ستي حفلة غسيل ، صا ر لها أكثر من ساعة تحاول إشعال النار ، إنتفخ قلبها و ما اشتعلت ، و هي تنفخ لأن الحطب كان رطباَ من مطر أول البارحة، و بعد جهد طويل إشتعل الحطب تحت الدست، إنتظرت ستي حتى سخن الماء و بدأ يغلي و قبل أن تضع الغسيل فيه...
صاحت مئذنة الجامع بأن حج معروف مات..
ألغت ستي حفلة الغسيل، و أجلتها إسبوع ، لأنه بعرف الضيعة ما بيصير تنشر الغسيل إذا مات أحدهم بالضيعة قبل مضي إسبوع أو عشرة أيام على وفاته .
أسندت ستي ظهرها إلى الحائط لتستريح قليلاً ، فيما أخذت جوالها و راحت تنشر غسيل الناس على الفيس بوك و على الوتساب و على السناب شات و ....

++++++++++++++++++++++++

يويمات ستي(5)

جدي سليمان الله يرحمه كان صوفي منشان هيك راح ع السفر برلك إلى العراق منشان يقاتل مع العثمانيين ضد الإنكليز
بينما جدي مرعي الله يرحمه كان معروف إنه قومي عربي فراح على الأردن يقاتل ضمن الجيش العربي مع الإنكليز ضد العثمانيين
إنتهت الحرب العالمية الأولى إستشهدوا جدودي الإثنين، ترملت ستاتي، تيتم أعمامي و أخوالي، و إنتصر الإنكليز...

+++++++++++++++++++++

يوميات ستي (6)
كان جدي عم يفلح و نزلت الدنيا بالمطر، وقف الفلاحة و رجع على الضيعة، و المطر كان عم يزيد و يزيد، و لمن وصل إلى غربي الخربة رطمت البغال بالطين ، حاول جدي يطالعها ما قدر، راح فزع أهل الضيعة ، إجتمعت كل زلم الضيعة غربي الخربة و تحت المطر والطين ، بس كل محاولاتهم باءت بالفشل، يئسوا و تركوا البغال عالقة بالطين و رجعوا على بيوتهم..
قالت لي ستي: ما بتصدق إنه البغال ظلت عالقة بالطين لعدة أيام و بعدين ماتت أمام عيوننا و ما قدرنا نساوي شيء، و إنفجرت بالدموع، قالت لي: كل ما بتذكر هالحادثة بينحرق قلبي.
فتحت جوالي و قلت لها يا ستي إحمدي ربك ألف مرة ، شوفي أهلنا بالشمال كيف غرقانين هنن و مخيماتهم و أولادهم و فرشهم و كل شيء غرقان بالوحل و الطين، و ما رح قلك إنهم غرقانين بدمائهم كمان.

+++++++++++++++++++++

يوميات ستي (7) قصة قصيرة جداً

ركبت ستي وراء جدي على البغل و راحت معه على الكرم بدهم "يحوشوا" عنب و تين
و هنن عم يشتغلوا كل ما لقت عنقود عنب كبير أو حبة تين كويسة كانت تحط و تتصور سيلفي معها و تنشرها.
جدي ما كان عاجبه الوضع ..كان يقلها اشتغلي يا حجي لا تلتهي بالجوال
المهم زودتها ستي كثير
قام جدي عصب و قال لها يخرب بيتك طيرتي البركة من الموسم
الله يلعن أبو إلي إخترع هالشيطان
و قام حلف يمين بالحرام إذا بتشغل الجوال
زعلت ستي و حردت ..حاول جدي كثير يراضيها فرفضت
و ما رضت حتى قام جدي و أخذ صورة سيلفي معها و مع العنبات و التينات و نشرتها ستي على حالتها مباشرة

++++++++++++++++++

يوميات ستي (8)
بعد كم يوم بدها تولد عنزة ستي
و طلبت ستي من جدي يحتفلوا بهالمناسبة على برج دبي
جدي بالأول ما وافق..
قال لها يا حجي و الله ما معنا حق طحين منين بدي جيب لك هيك مبلغ
قالت له ما عليك أنا عاملة مطمورة بحق بيض الجاجات... بس جدي بقي معارض الفكرة لأن عنده فلاحة و ما بده يتعطل و لا يوم ...وبعد نق و دق وافق جدي بس إختلفوا على لغة الكتابة
ستي بدها إياها بالإنكليزي مع أنها ما بتفهم لا بالعربي و لا بالإنكليزي و كانت تقول لجدي اذا انكتبت بالعربي هيك بتطير كل فرحتي
و جدي كان مصر على اللغة العربية
المهم بعد مناقرات طويلة إتفقت ستي و جدي ان تكون العبارة نصفها انكليزي و نصفها عربي
و اتفقوا أن يكتبوا
It's  سخلة
,,,,,,,,,,
قاموس
سخلة: مولود العنزة إذا كانت أنثى

++++++++++++++++++++++++

يوميات ستي (9)

ستي الكحيانة ما بتعرف شقد مواليدها

بس بتقول انها ولدت بالحرب العالمية الاولى

بس صورة بروفايلها على الفيس بوك كانت صورة لأنجلينا جولي و اسمها كان أميرة زمانها

المهم كل يوم على الخاص يوصلها عشرات الرسائل من المعجبين و الي حابين يتعرفوا عليها

ستي كانت خايفي من جدي يشوف هيك رسائل و كانت تحذفها أول بأول بدون حتى ما تقراها

بيوم من الأيام كان الجوال مع جدي و وصلت رسالة غرام

ضحك جدي كثير و راح يرد على الرسالة باسم ستي على أنها بنت صبية

اجت ستي قالت له شو عم تساوي يا حجي؟

ضحك و قال لها لقيت لك عريس لقطة.

++++++++++++++++++++++++

يوميات ستي (10)

بعثت أم سليم رسالة على الوتساب لستي قالتها بدك تخبزي اليوم

إذا بدك تحمي التنور لأعجن و جهز حالي على الخبز

قالت لها ستي اليوم عنا خبز لبكرى إنشاء الله

قالت أم سليم جهزينا خمس رغفان قرضة لبكرى لكان

إجت أم سليم لتاخذ الخبزات قعدت هي و ستي و فتحني بث مباشر و هنن عم يشربن الشاي و من سالفة لسالفة مع صديقاتهن على البث المباشر هيك حتى أذن الظهر

قامت أم سليم و رجعت على بيتها لتساوي غدي لعيالها...نسيت تاخذ الخبزات بس أخذت معها سبعين لايك و وأكثر من 200 تعليق و تسع مشاركات على البث المباشر.

++++++++++++++++++++++++++

يوميات ستي (11)

قالت ستي لجدي : قررت صير يوتيوبر أشو رأيك يا حجي

قال لها جدي أشو إلك بهالعلاك المصدي

و هنن عم يتناقشوا بالموضوع نام جدي من شدة تعبه و هو من الفجر للمغرب عم يشتغل بالأرض ما نامت ستي بهديك الليلة إلا و كانت قناتها على اليوتيوب جاهزة

و من الصبح كان لها أول فيديو و هي عم تطعمي الجاجات

و كانت عم تقول الجاجة الحمرا بتصبحكم بالخير

و سيل من الاعجابات و التعليقات و المشاركات

الفيديو إلي بعده كان العنزة الشقراء تمسيكم بالخير

الفيديو الآخر بقرتي الحلوة حابي تسلم عليكم

و أصبحت ستي مشهورة يتابع قناتها ملايين المعجبين و تحصد ملايين اللايكات و الاعجابات و تجمع آلاف الدولارات

و في يوم من الأيام عصب جدي على ستي بعد ما أهملت شغل البيت

قالت له ليش عم ترفع صوتك ..أنا إذا عنزتي قالت ماع بطالع مصاري قد شغلك بالأرض لسنة

فلا عاد تشوف حالك علينا و عطول ضاربنا منية بشغلك بالارض ...

سكت جدي ..على مبدأ السكوت حكمة و فيه السلامة

الله يرحمه كان حكيم...

وسوم: العدد 950