ليه يا مواطن

للشيخ عبد الحميد صقر

المولود 1933م ، نسأ الله في أثره !

1

يا ابن البلاد العزيزه يا ابن نهر النيل

يا ابن الندى والكرم والفن والموواويل

يا ابن الأكابر ويا ابن الحلم والأخلاق

فينك يا وِلْد الشهامه يا عظيم يا أصيل

2

ليه يا مواطن تغش فْ صنعتك يا ابني

وتقول دا سوق العمل محتاج وبيبني

لا حد شايف ولا حاسس بما يجري

حَمِّلْ ومَشِّي وبعد الشغل حاسبني

3

والفن أصبح صراخ عالي وْصخب وعويل

فين الطرب والغُنا والمعنى والمواويل

يا عم بيرم فِ عرضك قوم وسَكِّتْهم

دا احنا انشوينا غُنا منهم من القلاقيل

4

كورْةِ القدم أصبحت من مَضْيعات المال

مصدر لحقد وكراهه لسائر الأجيال

هي الرياضه كده يا خساره يا ولادي

كنت افهم ان الرياضه سرور وراحة بال

5

يا بو البنات استحي وامشي على قدك

يا بو البنات شوف أبوك قبلك وشوف جدك

اوعاك تبص وتقول دا فلان ودا علان

يا غافل اسمع كلامي ولا تجوز حدك

6

المرأه تنفع مديره إنما في البيت

دا البيت بغير المره يصبح مصيره الموت

خليتو ليه الميزان يختل يا اخوانا

دا المرأه أصلًا في دنياها ميزان البيت

7

فين الولد يا مره والبنت راحت فين

راحوا لطابور الصياعه وما اكتر الصايعين

طال الطابور يا مره مين يِرْجعو تاني

وانتي يا أمي ويا بويه بره مشغولين

8

طاح الولد بين صفوف المدمنين بره

والبنت وسط التحرش والشباب دره

وانتي يا ست الحبايب غايبه عن بيتك

ما تعلمي عن ولادك شيء بالمره

9

الست كانت بِتِدِّي الدرس لعيالها

الست كانت بتطهي الأكل لرجالها

الست صارت مديره ومين يحاسبها

كانت في جره وطلعت بره يا ويلها

10

الأم قدوه لأعز الناس أولادها

الأم رحمه لأغلى الناس أحفادها

القدوه راحت مع الرحمه وما عادت

يا رب لطفك أَعِدْها لبيتها وأولادها

11

الأسره نبته جذورها الأم يا فالح

لو تخلع الجدر إيه راح يبقى يا ناصح

حافظ على النبته وارعاها وكَبَّرْها

تحصد تقاوي الكرم دايما وجيل صالح

12

ومهما قلنا عن الستات وأحوالها

والفكر يسرح يمين الدنيا وشمالها

ترجع بخيبة أمل في المرأه يا ولدي

خيبه ف صميم الرعايه عايزه تقتلها

13

أما المدرس إذا دخل الفصول يلعب

ويقول دروسنا خصوصي لكل من يرغب

والمدرسه يقفلوها بعد شهر يا دوب

يا طالب العلم لا تحتار ولا تتعب

14

أما الموظف ودُرْجو للحرام مفتوح

وان قلت له شيء قال ما بعد روحي روح

وان قلت عيب استحي دا الرب هيحاسبك

قال وقتها تِفْتَرَجْ باب الفرج مفتوح

15

والتاجر اللي وقف في السوق بيتعامل

بايع وشاري لكل الناس وبيخاتل

اعمل حسابك هتتحاسب على فعلك

والرب شايف وهيجازي ولا يجامل

16

أما الضرايب لها عندي كلام وكلام

بطرس عملها قضيه وما لها أحكام

الظلم فيها أساس الملك والحكمه

العدل فيها بريء والظلم فيها قَوام

17

ماء المجاري بقى مشروب لكل الناس

للخلق للزرع للحيوان ولا إحساس

حتى انهرى الكبد وانسدت كلاوينا

يا رب نشكو إليك فعل العباد بالناس

18

أصل الوساخه طبيعه عند بعض الناس

سابوا النظافه ومالها عندهم إحساس

تعرف تقول لي النظافه إيه لزومها إيه

خليه قذر دي القذاره عندهم مقياس

19

وان رحت يوم للطبيب تكشف على حالك

عشان يشوف لك دوا ويستريح بالك

قال لك عليك بالأشعه وتعمل التحاليل

ويشيلك هم غير وقتك وغير مالك

20

والشرطه لو رحت يوم تشكيلها م اللي كان

قالوا لك اسكت وروح بيتك وعيش في أمان

دا المجرم اللي بتشكي من أفاعيله

غادر وفاجر وبيخوف وماله أمان

21

بعنا البلد يا ولد حِتَّه ورا حِتَّه

ما حد قادر يطلع صوته ف الحِتَّه

والقطن أصبحنا نسمع عن زراعته زمان

والغزل والنسج راح بالجُمْله والحِتَّه

22

والمُسْلِماني يقول في طبعتو الأوله

يصرخ لرب السما وما نسي ليله

يا احمد يعوض عليك ربك في مجهودك

ما حد سامع لنقدك م الفئه الأولى

23

انفض إديك من جماعة فتح وحماسها

دا دول عصابه أحط الناس وأنجاسها

وبسرعة نسيوا حَدَثْ صَبْرا وشاتيلا

أَيْلولْ وزَعْتَرْ لا أصحابها ولا ناسها

24

وابن السباعي الشهيد يوسف وما نسيناه

ليه يقتلوه الكلاب ليه يَتِّموا أَبْناه

الغدر من طبعهم والحقد دَيْدَنْهُمْ

أهل الخيانه ولا ذنبٍ بإيده جناه

25

ليه يا مواطن تبهدل مصر وتخونها

وانت ولدها يجب تحميها وتصونها

انت عليها أمين وانت الأمل دوما

في كل موقف في أفراحها وأحزانها

26

مصر اللي كانت تحبك زي نور العين

ترعاك زمان الطفوله والشباب يا زين

وتقول يا رب احفظه وارعاه بتوفيقك

عالم وزارع وصانع في الحراسه أمين