الطفل المدلل

أعزائي القراء ..

الكثير من العوائل ينتظرن طفلاً ذكراً بعد  ولادة ٦ بنات لهن  أو اكثر ، ثم يولد المدلل بمشيئة الله ، و يكبر المدلل بين أخواته البنات  بالشبر والندر،  ويذبح له الخواريف ، بينما  روائح البخور تملأ "حارتو"  والحارات المجاورة  ، وصارلو عرس مطنطن يوم طهورو ، ولما طلعوا سنينو اشتغل رش الدردر ، والعزايم من الكبب للمحاشي والمشاوي، ولما خطا أول خطوه… 

يا ارض اشتدي و ما حدا قدي ، ثم يبدأ البابا والماما بالصراخ بالبنات عند كل نعوصه للصبي:

- بنات ديروا بالكم ماحدا يزعل اخوكم.

هادا حموده حبيب قلبي  

-وليك انتي سميرة شفتك .. ليش اخوكي عبيبكي مين ضربو .. والله لأكسر راسك انتي وخواتك.

-تعا حبيبي حموده لعندي شوف اش اشتريتلك روحي.

ويكبر  الصبي وسط هذا الدلال المتميز وتطول يده على اخواته وحتى على ولاد الحارة  ورفقاتو بالروضة وكل يوم تأتي شكاية من الجيران والمعلمة  وهات يامشاكل بين الآباء والامهات  وكلو من تحت راس حموده هالصبي المدلل.

أعزائي القراء..

هذا مثال واقعي على ما يجري اليوم  في بلادنا العربية حيث يقوم بدور الصبي المدلل دادا بشار  والحكام العرب هن اخواته البنات .

، والبابا والماما والخاله  هنيك ساكنين بين امريكا واوروبا وروسيا  والكل عينيهم على هالصبي… لا حدا يصيبو بالعين والخرز الازرق والبخور مع كل زائر يصل لعند الدادا بشار .هذا الصبي المدلل يحق له ما لايحق لغيره ، فهو يضرب ويقتل ويسجن  ويسمم ويذبح ويهجر ، بينما البابا والماما  مبسوطين والخاله عبتضرب  معو لأنو  ماشا الله الصبي كبر وصار يفهم كيف يتسلى ويلعب  ، وكل ما بيكبر سنة يزداد دلال البابا والماما في واشنطن وتل ابيب والخاله في موسكو ، وكل ما يقولونه لهذا الصبي المدلل: 

-كن باصبي ..  اهدا  ياحبيبي … حاج بابا بعدين بزعل منك .،،

- لا ياحبيبي .. لا يا بابا ..لا تمد ايدك على ولاد الحارة كتير  بعدين ما بحبك هدول متل اخوتك .

-  شوف حبيبي  اش بعتلك؟ هدية حلوة  من روسيا من عند خاله بوتين  ، وكمان الدادا عبد الله من الامارات جايبلك هدية كتير حلوة … شوف ما احلاها بتلبقلك.  والصبح  تكرم دقنك راح اخداك معي تش  .. 

هات بوسة حبيبي وروح على تختك هلق لف العروسة ونام.

أعزائي القراء..

فعلاً هذه صورة تقترب من الواقع لكيفية تعامل دول العالم مع هذا الطفل المدلل. فخلال ١٢ عام واكثر، لاتسمع من البابا والماما تبعو سوى الدلال .. البلد خربت  والبابا والماما  :

 -  لا حبيبي … لا روحي ..شوي شوي مو هيك بعدين ما بحبك.

الكيماوي ريحتو وصلت المريخ : 

- حبيبي  بلالك هاللعبة بعدين بتأذي حالك!

مليون شهيد على ارض سوريا : 

- روح البابا والماما   الله يرضى عليك  ما هيك قلنالك لا  يابابا صاروا كتير دفنتم تحت التراب … حرام بعدين بزعل منك.

 ٨ ملايين خارج سوريا : 

- شوف حبيبي بعدين عمو  قيصر بيزعل  .

وعلى هادا و متلو  .

بالامس وصل دادا عبد الله من الامارات وهؤلاء لا يتحركوا الا بطلب من البابا والماما ،  شو جايب معو هدايا للدادا؟  لسه ما انكشفت والخبر اليوم بفلوس وبكرة ببلاش .

أعزائي القراء …

هل مر طفل مدلل على العالم كله مثل هذا الطفل ؟

والسؤال لماذا ؟

سؤال كبير .. كبير جداً

والاجابة  عند البابا والماما والتنت بوتين …واخوات الدادا من الحكام العرب.

وسوم: العدد 1014