أحمد منسي البطل الإنسان

clip_image002_69cf5.jpg

البطل الشهيد العقيد أركان حرب أحمد صابر محمد علي منسي جاء إلى الدنيا عام 1977 حيث كان مولده في مركز منيا القمح بـمحافظة الشرقي وبعد حصوله على شهادة الثانوية العامة التحق بالكلية الحربية  وعرف بالكفاءة وانضم لفريق الكفاءة البدنية بها وبعد تخرجه حصل على فرق مقاومة الإرهاب لكونه ضابطًا بقوات الصاعقة واشتهر بالبسالة والشجاعة في الدفاع عن تراب الوطن بين زملائه.

تولى البطل العقيد أحمد منسي قيادة الكتيبة 103 صاعقة خلفًا للشهيد عقيد رامي حسنين في أواخر شهر أكتوبر عام 2016 وعندما استشهد أحد أصدقائه الأبطال على أرض سيناء أثناء دفاعه عن الوطن ضد الإرهابيين نشر العقيد أحمد المنسي قصيدة رثاء عبر صفحته الشخصية على موقع التواصل الاجتماعي "فيس بوك" قال فيها :

يا قبورا تنادي أسامينا

ويا موتا يعرف كيف يصطفينا

سطوة الموت لن تغير لقبنا

فنحن أحياء للشهادة سائلينا

(ميت ) لقب من هو دوننا

والشهيد اسم من بالروح يفدينا

مهنتي الشرف والمجد أجنيه

وحب القلب للقلب يرضينا

قد قضيت في الأمن عدد سنين

وكم قضينا عن الأرض مدافعينا ؟

وكم قضيت هروبا من الموت ؟

وكم قضينا عن الموت باحثينا ؟

نبحث عن الموت أينما وجد

وفى الجنة مع أخوة سابقينا

من كان بلا عقيدة فليغادر

حق عليك وأسأل المقاتلينا

الله اكبر للقلب طربا

وذكر الله خير الحافظينا.

البطل العقيد أركان حرب أحمد منسي كان يعيش مع أسرته في مدينة العاشر من رمضان .

استشهد البطل العقيد أركان حرب أحمد منسي قائد الكتيبة 103 صاعقة يوم الجمعة 7 يوليو عام 2017 خلال الاشتباكات التي وقعت بين عدد من الإرهابيين ورجال القوات المسلحة بسيناء إثر استهداف التنظيمات الإرهابية نقطة تجمع قوات الجيش بقرية البرث بمدينة رفح ما أسفر عن استشهاد 10 أفراد من رجال القوات المسلحة.

البطل الشهيد أركان حرب أحمد منسي كان يتمتع بحب وتقدر قادته والجنود والضباط الذين عملوا معه .

 بعد استشهاد البطل العقيد أركان حرب أحمد منسي وعندما حصل البطل الجندي خفاجي على أجازة قرر الذهاب إلى مدينة  العاشر من رمضان والبحث عن منزل البطل الشهيد  وعندما وصل أدى التحية العسكرية إلى الطفل حمزة ابن البطل الشهيد العقيد أركان حرب أحمد منسي ثم ذهب إلى قبر البطل الشهيد وقرأ الفاتحة وظل يبكي بشدة .

البطل الجندي خفاجى من أبطال الصاعقة وعمل تحت قيادة البطل الشهيد العقيد أحمد منسي وهو من صعيد مصر وله خفاجى  أخ أكبر منه ويبلغ من العمر 39 سنة متزوج وعنده ( 4 ) أطفال و للبطل خفاجي أيضا أخوات 4 بنات على وش جواز وعندما ألتحق البطل خفاجي بالخدمة العسكرية توفى شقيقه خفاجى ووالده متوفى ووالدته عندها فشل كلوى وتعالج .

عندما تولى البطل أحمد صابر منسى الكتيبة خلفا للبطل الشهيد رامى حسنين جمع الجنود وقال : حد عنده أى مشكلة ؟

خفاجى رفع يده وقال : أنا يا فندم .

فى المكتب قال البطل أحمد منسي : خير يا خفاجى ؟

قال خفاجي : يا فندم أنا والدى متوفى وأخي متوفى وترك 4 أطفال وعندى 4 أخوات بنات منهم واحده بنجهزها دلوقتى علشان تتجوز وأنا اللى بأشتغل وبصرف عليهم وبنزل أجازة 10 أيام كل 35 يوم لو ينفع بس سيادتك تقلل المدة أو تزود لى الأجازة ؟ بس كده يا فندم ومش عايز حاجه تانى. قال البطل أحمد منسي قائد الكتيبة : أوعى يا خفاجى تكون بتكدب على قائد كتيبتك .

قال خفاجى : يا فندم ده رقم والدتى اتصل بيها وعنوانى عند سيادتك أسأل علينا .

قال البطل أحمد منسي : طيب ينفع معاك تنزل أجازة كل 15 يوم تقضيها معنا وتكون أجازتك 15 يوم ؟

قال البطل الجندي خفاجى مبتسما : يا فندم .. ولا أحلم بكده قال البطل أحمد منسي : طيب أنت نازل أمتى ؟

قال خفاجى : كمان 10 أيام.

قال البطل أحمد منسي قائد الكتيبة : لأ أنت نازل بكرة .. روح خلى مساعد تعليم يعمل لك تصريح ـ 15 يوم من بكرة ويجيبه لى أمضيه دلوقتى .

نزل البطل الجندي خفاجى أجازة وحاسس أن الحياة أحسن وأن ربنا بيطبطب عليه وبعت له ملاك من السماء أسمه أحمد منسى .. ويعدى يومين من الأجازة وتليفون خفاجى يرن .. يرد يلاقى القائد بتاعه !

قال الجندي خفاجي في نفسه :  هيرجعنى من الأجازة ولا أيه أستر يارب !

قال البطل أحمد منسي : أزيك يا خفاجى عامل إيه؟

قال خفاجى : الحمد لله يا أفندم أنا بخير.

قال البطل أحمد منسي : باقولك إيه .. أنت عنوانك أيه بالتفصيل .. يعنى لو عايز أجيلك أجيلك إزاى ؟

 وصف خفاجى العنوان تفصيلا وقال : هو حضرتك هاتيجى يا أفندم ؟

قال البطل أحمد منسي : آجى فين أنا بهزر معاك .

بعد ساعات خفاجى رجع من الشغل وكله تراب وعفار وهدومه مبهدله غبار ورملة من الشغل .

الباب خبط  .. فتح خفاجي ووجد البطل أحمد المنسي أمامه بيمد يده وبيسلم على خفاجى .

قال البطل أحمد منسى : مش هتحضنى ولا ايه ؟

قال الجندي خفاجى : يا أفندم مش عايز أبهدلك هدومك أنا لسه راجع من الشغل ومغبر .

قال البطل أحمد منسى : يا أبنى تراب الشغل ده نعمة من عند ربنا .. وحضنه ودخل سأل على والدته وسلم عليها وباس رأسها وإيديها وطلب منها الدعاء لهم وسلم على أخواته البنات وقال لخفاجى : عايزين نفرح والدتك بقى يا خفاجى ونجوز أخواتك .

طلب خفاجى انه يتغدى البطل أحمد منسى معاهم .. فقال البطل أحمد المنسي : والله سبقتكم أنتم أتغدوا بس وكلوا وأنا كده كأنى أتغديت والله .

 قبل أن ينصرف البطل أحمد منسى أعطى خطاب إلى خفاجى وقال له : فرح أمك يا خفاجى وعلى ما أرجع مصر تكون أديتنى تمام بأن الأجهزة الكهربائية بتاعت أختك كلها جت.

قال خفاجى : تمام يا أفندم .

نزل خفاجى وجاب حاجة أخته وخلصت أجازته ورجع الكتيبه أمر القائد البطل أحمد منسي أن خفاجى مايطلعش أى مداهمات خطر أبدا وقال لخفاجى : تصلى كل يوم الـ 5 صلوات و تيجى تصحينى علشان الفجر ولو أنت نايم أنا هصحيك وماتسيبش فرض أبدا وتتعلم الحلاقة وتنضم على حلاق الوحدة وهاجيب كرسى وأقعد فى وسط الكتيبة وتحلق لى علشان الكتيبة كلها تعرف انك بقيت الحلاق ولما يشوفوك بتحلق لى هيخلوك تحلق لهم واللى يدخلك من الحلاقة تاخد تلتينه ليك .

لما طلع البطل أحمد منسي البرث كان يكلم خفاجي باستمرار وأخر مكالمة قبل استشهاد البطل أحمد المنسي بساعات قال خفاجى : أزيك يا أفندم أمى بتقولى فى التليفون مافيش فرح من غير وجودك أمانة عليك يا أفندم لازم تيجى تحضر .

قال البطل أحمد منسي : إن شاء الله يا خفاجى بس أنت تيجى العاشر يوم كده والنقيب شبراوى هييجى معايا وتقضوا يوم عندى فى البيت إن شاء الله ويقفل السكة وينام خفاجى يحلم بالقائد مبتسم وبيقول له : قوم صلى الفجر يا خفاجى فيقوم يصلى الفجر ويرجع ينام يصحى على تليفون واحد زميله بيبلغه باستشهاد البطل أحمد منسي قائد الكتيبة .

قام خفاجي من النوع في فزع وخرج ووجد العساكر نايمين والشاويش قاعد وإيده على خده وصول واقف فجرى خفاجي وسأل : المقدم أحمد منسى ماله .

قال الصول لخفاجى : جالى تليفون أن البطل أحمد منسي أستشهد .

بكى خفاجي وردد : أبويا مات ..  أبويا مات .

بعد أن زار حفاجي منزل البطل الشهيد أحمد منسي ثم قبره عاد إلى بلده وقال لخطيب أخته : مافيش فرح قبل أربعين أبويا .. أنا أبويا مات وتأجل الفرح وبكت أم خفاجي وطلبت تروح تزور قبر البطل الشهيد أحمد منسي رغم مرضها .

عاد البطل الجندي خفاجى إلى سيناء لمواصلة حمايتها والدفاع عنها وعن مصر والأخذ بثأر البطل الشهيد العقيد أركان حرب أحمد منسي قائد الكتيبة .

وسوم: العدد 763