يا سْماحة اسْمَحلي إلَّكْ
طريف يوسف آغا
يعرف الجميع أن الوزير والنائب اللبناني السابق ميشيل سماحة هو من الأبواق السياسية للنظام السوري قاتل شعبه ومن المسوقين له إقليمياً ودولياً. ولكن لم يتوقع أحد أن يكون قد وصل أيضاً إلى مستوى (مخبر) لأمن هذا النظام و(عتال) لمتفجراته و(ساعي بريد) له في بلده لبنان.
يا سْماحة اسْمَحلي إلَّكْ
قصيدة بالعربية العامِّية- الفصحى
ياسْماحة اسْمَحلي إلَّكْ
شو كانْ بهالطَبخة بِدَّكْ؟
حَدْ بيطبخْ مَعْ عِصابة
عمْ تشربْ مِنْ دمِّ البلَدْ ودمَّكْ؟
جبتْ العارْ لحالَكْ
ولَولادَكْ وبَيَّكْ وجدَّكْ
وانت عَحسابْ وزيرْ ونايبْ
ولابِسْلي بَدلة وكرافة وماحَدا أدَّكْ
مابتِفرِءْ عَنْ حَسونْ إلا باللَّفة
بِدَّكُمْ كياسْ زبالة تلفّو وتلفَّكْ
كنتْ اسْتحي على هالشيبة
شو تركتْ يشْفعلكْ بآخِرتَكْ؟
وبذمْتَكْ شو حَتفيدكْ هالدولاراتْ
وأنت، لاتواخِذني، على حَفّةْ أبْرَكْ
***
ياسْماحة لَو تحكيلنا منِ الأولْ وبصَراحة
كَمْ تفجيرْ وقَّعتو باسْمَكْ؟
وشو بتعرفْ عَنْ مَيْ وسَميرْ وجبرانْ؟
وغيرهُنْ الكتيرْ منْ ضحايا ولاد بلَدَكْ؟
وشو قصة (بَشّار بَدّو هَيكْ؟)
شو أنتْ مافي فَسْفورْ بعئلَكْ؟
مابتعرفْ هالنِظامْ إذا حالَفتو توَسَّختْ؟
وإذا عاديتو سَلَخْ جلدَكْ؟
وإذا وئَّفتْ تتفَرَّجْ عذَّبَكْ ضَميرَكْ؟
إذا كانْ بعد في ضَمير عندكْ
ياسْماحة مابعرفْ شو بَدي إلَّكْ
بس فيني أولْ إنَّكْ حَفَرتْ بإيدَكْ
إذا رحتْ فيها مُؤبَّدْ، ماحدْ رَحْ يزعَلْ
وإذ ا رحتْ فيها إعدامْ، الله لايردَّكْ
