يشبحون بحمد ربهم
هالمقال مو للاستهزاء بالأديان أو بالذات الإلهية , بس هي وجهة نظر شخصية بالواقع يلي عايشتو سوريا ….
متل ما في ديانات الإسلام و المسيحية و اليهودية و البوذية و الزردشتية و …. و …. في الديانة المنحبكجية , و هاد تعريف بهل الديانة :
- العقيدة : قائمة على عبادة الرئيس وأي حدا من عيلتو , لأنو هو رب بالنسبة للمنحبكجية فمن الطبيعي أنو عيلتو أرباب كمان (على مبدأ ابن الكلب كلب)
- الصلاة : التشبيح في كل زمان و مكان و بكافة الوسائل الممكنة , القتل , الضرب , التهديد , التشبيح الإعلامي , الحكي و البعبعة , التشبيح الالكتروني و هو أضعف الإيمان …
- الزكاة : التبرعات للشبيحة و هي شغلة رؤوس الأموال الكبيرة بين أتباع هالدين
- الحج : الخروج بمسيرات مؤيدة للرئيس و السجود لصورتو و الطواف حوليها في المنتزهات و الحدائق العامة أو بنص أوتستراد المزة متل ما بيّنت صورة (الطو*زة على أوتستراد المزة) تترافق هالشعائر الروحانية بالهتافات و الشعارات التوحيدية للرئيس و بعض الأغاني و الأهازيج المعروفة متل – منحبك (تيتيريتي تيريتي) منحبك (تيتيريتي تيريتي) منحبك (تيتيريتي تيريتي) منحبك (تيتيريتي تيريتي) منحبااااااااك – للمغنية المعروفة شهد عربدا
- الصوم : بأنو يسدو حلقون و ما حدا يجيب سيرة (الإله تبعون) بعد ما يهر عن عرشو الرئاسي (تجدر الإشارة إلى أنو ما سبق و عملو هالطقس الديني هاد , بس نشالله حيبلشو فيه عن قريب و حيضلو صايمين ليوم القيامة)
- الرابوع المقدس : حافظ , باسل , بشار , ماهر بصورة وحدة و هنن حاطين النضارات يا معلم و الصورة تحت اسم (هكذا ينظر الرابوع … يومياً مع الراقصة الاستعراضية …. و بتكمل دعاية كباريهات الربوة)
مشاهير الطريقة المنحبكجية :
- مفتي الديار المنحبكجية : أحمد بدر المنحبكجية حسون (بدر الدين سابقاً)
- رئيس بيت مال المنحبكجيين : رامي مخلوف (في إشاعة بارتدادو عن دينو و اتباعو أحد الأديان السماوية , بس أنا بأكدلكون أنو لسا على ديانتو الدموية)
- حامي حمى المنحبكجيين : ماهر الأسد برتبة (كو غاد) إله مساعد يعني , لأنو من العائلة الحاكمة
المسؤولين الإعلاميين :
طالب إبراهيم (على سنّة الأسد و شبيحتو)
خالد عبود (أكد بلقاء معو أنو إله المنحبكجية مخروط خرط …. ما بحط حدا بزمتي)
في أكتر بكتير من هيك بس بصراحة أنا لعت نفسي تمام و ما عاد فيي أكتب أكتر من هيك لأنو إزا بدي كمل سرد بهالشخصيات المقرفة هي بيجوز بق كل شي بمعدتي على اللابتوب , وحوينة اللابتوب بهيك حشرات ….
